دومین گروه از شهروندان افغان از سودان خارج شدند
به گزارش خبرنگار سایت افغانستان خبرگزاری فارس، وزارت امور خارجه طالبان از تخلیه ۴۳ تن از شهروندان افغانستانی از سودان به عربستان خبر داد.
حافظ ضیا احمد، معاون سخنگوی وزارت امور خارجه طالبان در رشته توییت‌هایی نوشت که این تعداد از شهروندان افغانستان در دومین اقدام برای تخلیه افغان‌ها در سودان، به عربستان انتقال داده شده‌اند.
به گفته ضیا احمد، شهروندان نجات داده شده افغانستان از سودان به شهر جده منتقل شده و در هتل‌های این شهر به صورت موقت اسکان یافته‌اند. قرار است آنان به‌زودی به افغانستان منتقل شوند.
معاون سخنگوی وزارت امور خارجه طالبان هرچند در مورد شهروندان باقی‌مانده افغانستان در سودان آماری نداده اما تاکید کرده که تلاش‌های آنان برای نجات شهروندان گیرمانده ادامه دارد.
طالبان پیش از این نیز از تخلیه نخستین دسته از شهروندان کشور از سودان به عربستان خبر داده بودند.
طالبان در هر دو دور از تخلیه شهروندان کشور از سودان، از همکاری همه‌جانبه و بی‌قیدوشرط عربستان سعودی قدردانی کرده‌اند.
گفتنی است که امیرخان متقی، سرپرست وزیر خارجه طالبان، نزدیک به ۱۰ روز پیش گفت که ۱۲۰ تن از شهروندان افغانستان در درگیری‌های سودان گیر مانده‌اند.
پایان پیام/ ر